創科阿叔心理分析

 創科阿叔心理分析

香港啲創科阿叔點解大部份都行為怪異，相信呢個問題困擾左好多香港人，而家嘗過分析一下佢地嘅心理。過往一年見左太多阿叔，有商會，有學界，學業界。佢地不約而同有一個非常古怪嘅行為，就係叫你停止你嘅創科研究。以下分析一下佢地究竟個腦諗乜，我唔係專業嘅心理學家，但都睇左唔少哲學書，希望俾到大家一定參考性。

原因一 ： 啲阿叔講白啲就係想你跟佢嗰套

呢一個點其實佢地好難達到，因為佢地係科技上根本都無乜料到，就算係佢地嘅領域，只要你一問深入少少，佢地都唔會俾到啲好solid嘅意見。過往一年因為我想搞個cpu所以見接觸到好多自稱電子界老行尊，微電子界小生嘅阿叔，食過好多次飯，途中我問佢地點設計晶片，無一個講得出實際操作，你好容易feel到佢係唔講定唔識，其實呢啲野無得呃人，佢地分享佢嘅野同埋所謂經驗不外乎講以前做咩product賣左幾多錢，邊間大公司用緊有幾威咁。另外一種就話以前條team有幾多猛人有幾疊友咁。無論你問得幾solid幾tech，佢地一律用呢兩種形式回答。有次我直頭好直接咁問佢地用咩軟件設計晶片，佢地講得出間公司名但講唔出個軟件名，嗰一刻我知咩事。

通常人係咁，如果好有料，你問佢實際野佢一開口就會答返你實際野，食一餐飯吹水話題還吹水，一討論啲實際野就大家會講返實際野，唔會成晚得個翕字。先假設我無講錯，咁就引申人類兩種普遍都有嘅性格。第一種就係我話俾你知一啲我嘅實際經驗，例如1+1=2，如果你唔聽或者唔認同，其實我唔會有太大反應。相反，如果講啲好虛嘅野通常會引黎爭論，有爭論就想對方屈服，加上阿叔嘅年紀大你咁多，又自以爲社會經濟秒殺你，所以心裏面係好想佢講一句你就即跟，而家阿叔嘅實力無可能為你提出啲實際野而叫你跟，咁佢地就會攞一啲死數據例如你無幾百億唔好掂，又幾百人又唔好搞，用呢啲死數字叫你放棄，從而達到你跟佢收皮嘅快感。

原因二 ： 上一代個社會唯利是圖，啲阿叔普遍都係

你同佢地講科研，開口埋口問你點賺錢，有無客底。你地有無留意到科學園，數碼港同創新科技署啲計劃全部都係講錢，所有申請都要有一個好solid嘅business plan，solid到要寫明咩時間有幾多收入，呢啲叫科研？我地上一代做電子嘅其實係做廠，代工歐美啲訂單，無錯好多人發左達，但而呢班阿叔以創科成功者自居店領左好多商會同政府要職，而科學園同創新科技署好多時候就係揾呢班友做board，所以解釋到點解香港政府啲plan永遠講錢講回報。係廠佬嘅世界講錢係合情合理嘅事黎㗎，不過大家唔好唔記得，好多偉大嘅發明，係佢地嘅時代係無經濟利益，一百年前有無人可以用相對論賺錢？有人會反對話呢個比喻係pure science，而computer science係applied science，咁我舉多個例子，OOP由提出到第一個商用compiler賣出相距二三十年，咁OOP如果由香港人提出都唔會得到資助。如果永遠用錢去計應唔應該做，咁好多科學都唔應該做。